《1000蚊美金 同股神巴菲特一齊 做美國佬債主（上）》
- 2024年1月8日
- 讀畢需時 2 分鐘
《1000蚊美金 同股神巴菲特一齊 做美國佬債主（上）》
上個 post 講到香港政府出綠色債券有 4.75 厘一年，今個 post 分享吓另一個全世界最勁揪嘅投資產品－美國國債！
簡單嚟講就係我哋借錢畀美國政府，例如美國政府想向大家借1萬蚊美金，佢願意喺2年後嘅今日還返本金畀你，中間佢會每半年畀一次利息你。之後佢就發行 100 張 100 蚊美金嘅債券（即係欠單），咁信得過美國佬會還錢嘅你咪借畀佢囉，你拎住張欠單就可以 2 年後同佢收返個本同每半年拎一次息，然後張欠單就畀返美國佬，同銀行信得過你借錢畀你一模一樣！
但係美國政府或者任何政府發行債券都係喺一級市場，即係第一個真金白銀拎錢出嚟借畀美國佬嗰個。而我哋通常都係喺二級市場到做買賣，即係我哋交易嘅係嗰張借錢畀美國佬嘅欠單，你喺任何一個證券商或銀行買嘅都係其他人賣出嚟嘅欠單。
如果你係直接同美國政府買嘅，例如話1萬蚊美金，2年後到期，每年派2%息，每半年一次，即係每半年你可以拎到 USD$10,000 * 2% / 2 = USD$100，到期 2 年後佢就還埋個本金1萬蚊畀你。
但係如果你係喺二手市場買，就要留意你同其他人買張欠單嘅價格，睇吓上面富途牛牛張圖，呢張美國佬嘅欠單係2024年5月31號到期，每年派 2.5% 息，每半年派一次，假設你係買1萬蚊美金入手，拎住呢張欠單，你每半年就可以收到 USD$10,000 * 2.5% / 2 = USD$125。
但係但係！點解會寫到期年化 5.45%？明明淨係得 2.5% 息拎到咋喎！上面都有講過呢個係二手市場，你係同其他人買緊張欠單，唔係直接畀錢美國佬使，原本呢張欠單係值 $100，而家因為債價跌，只係值 $97.911。即係話你用 $97.911 嘅價錢買入，揸到 2024年5月31號，美國佬就會用 $100 同你贖返走你張欠單，所以 5.45% 呢個數係計咗每半年嘅利息再加你 $97.911 買入但最後 $100 賣返張欠單畀美國佬嘅差價，即係賺息又賺價！
下個post分析下同定期有咩分別，記得like同share🫡
